دمشق، پیرس(پاکستان پوائنٹ نیوز09۔جنوری2017ء) شام نوں پنج ورھیاں تیکر خون دے سمندر وچ غرق کرن دے بعد شامی صدر بشار الاسد دا کہنا اے کہ حلب اُتے کنٹرول حاصل کرن دے بعد اوہناں دی حکومت فتح تے کامرانی دے راہ اُتے اے۔ بشار نے ایہ گل فرانسیسی میڈیا نوں دِتے گئے اک انٹرویو وچ آکھی۔شامی حکومت ولوں عام لوکائی اُتے ظلم کرن بارے سوال دے جواب وچ اوہناں دا کہنا سی کہ صاف ستھری یاں چنگی جنگ کیتے نہیں ہوندی۔
نال ای شامی صدر نے مَنیا کہ خطرناک قسم دا ظلم وی ہویا پر اوہناںدا کہنا سی کہ سارے فریق ای اوہدے ذمے وار نیں۔ حلب اُتے ڈاڈھی بمباری دے نتیجے وچ ہون والیاں موتاں بارے سوال دے جواب وچ اوہناں دا کہنا سی کہ یقینن کدی، کدی ایس طرحاں دی قیمت ادا کرنا لازم ہو جاندا اے۔ اوہناں نے ہور آکھیا کہ میں کدی نہیں سنیا کہ تواریخ وچ کوئی چنگی جنگ وی لنگھی ہوئے۔ اودھر فرانس دی قومی اسمبلی دے رکن تیری ماریانی دے مطابق شامی صدر دا کہنا اے کہ حکومت ولوں کئی غلطیاں ہوئیاں نیں جہدے اُتے مینوں افسوس اے تے میں اوہناں دی مذمت کرنا واں۔ ماریانی نے ایتوار دے دیہاڑے اک فرانسیسی وفد نال بشار الاسد نال ملاقات کیتی سی۔
