کابل،پجنگ(پاکستان پوائنٹ نیوز09۔جنوری2017ء) چینی تعمیراتی کمپنی افغانستان وچ اہم سڑک اُسارے گی، سمجھوتے اُتے دستخط ہوگئے، سڑک افغانستان دی اقتصادی ترقی وچ وادھا تے دوجےاں صوبیاں نوں آپس وچ جوڑے گی، 178کلو میٹر لمی سڑک قومی شمالی جنوب کا ریڈور دا دوجا حصہ اے، منصوبے اُتے 205ملین ڈالر لاگت آئے گی۔ چائنہ ریڈیو انٹرنیشنل دے مطابق چینی کمپنی روڈ اینڈ بریج کارپوریشن (سی آر بی سی) نے وچکارلے افغانستان وچ اک اہم سڑک دا وڈا ٹینڈر اپنے ناں کر لیا اے جہدے لئی افغان حکومت تے چینی کمپنی وچکار سمجھوتے اُتے دسخط ہو گئے نیں، سمجھوتے اُتے چین سڑک تے پل کارپوریشن دے وائس چیئرمین لورسم تے افغان وزیر محمود بالگ نے دستخط کیتے، ایس منصوبے اُتے 205ملین ڈالر لاگت آئے گی جو ایشیائی ترقیاتی بنک دیوے گا۔
سمجھوتے دی تقریب افغان صدارتی محل وچ منعقد ہوئی جہدے وچ افغان صدر اشرف غنی، چین دے نائب سفیر جیانگ زی شین تے ہور اعلا حکام نے رلت کیتی۔ ایس موقعے اُتے افغان وزیر پبلک ورکس محمود بالگ نے آکھیا کہ چینی کمپنی دے اُساری منصوبے کارن افغانستان دی اقتصادی ترقی وچ وادھا ہووے گا تے ایہ سڑک 37توں ودھ پنڈاں وچوں لنگھدی ہوئی صوبے بامیان دے ضلع یاکولانگ تے شمالی صوبے سامنگن نوں اک دوجے نال جوڑے گی۔
ایہ 178کلو میٹر لما منصوبا قومی شمالی جنوب کارویڈور دا حصہ اے تے ایہدا پہلا حصہ شمالی شہر مزار شریف توں یاکولانگ تیکر پہلے ای مکمل ہو گیا اے۔ افغان وزیر دے مطابق کوریڈور دے تیجے حصے دا وی سروے مکمل ہو گیا اے ایہدے وچ 550کلو میٹر سڑک، جنوبی صوبے قندھار تے ارمیان نوں آپس وچ جوڑے گی۔ ایس منصوبے دے نتیجے وچ ملک اندربہتری آئے گی۔ مقامی کساناں نوں فائدا ہووے گا۔
منصوبے نوں پہاڑی علاقے وچ مکمل کرن لئی ساڈھے تن سال لگن گے، 8وڈے پُلاں دے نال نال 194نکے پُلاں دی اُساری وی کیتی جائے گی۔ ایس موقعے اُتے چینی کمپنی دے سربراہ نے آکھیا کہ افغانستان چین داچنگا گوانڈھی اے تے چین افغانستان دی تعمیر نو دے عمل وچ اک اہم کردار ادا کرے گا۔ منصوبے لئی ایشیائی ترقیاتی بنک ولوں مالی مدد کیتی جائے گی۔
