دبئی(پاکستان پوائنٹ نیوز16۔فروری2017ء) 1993وچ 21ورھیاں دی ایتھوپین کُڑی سارہ عریدی دبئی وچ پہلی وار آئی۔ جدوں اوہ دبئی آئی، اوس ویلے اوہدے کول صرف 500ڈالر سن۔ سارہ نے 1993توں 1999تک نِکے موٹے کم کر کے کوششاں جاری رکھیاں تے اوہدا ای نتیجہ سی کہ 1999وچ پہلا ریسٹورنٹ ’حبشہ‘ ناں دا کھولیا۔ اوہدے مگروں سارہ نے ایتھوپیا وچ انڈین فلماں وکھان لئی ویڈیو سنٹر وی کھول لیا۔
ویڈیو سنٹر وچ امتابھ بچن، سلمان خان تے شاہ رخ خان دیاں فلماں وکھائیاں جاندیاں سن۔ پر اصل ترقی دوجا ریسٹورنٹ کھولن مگروں ملی جو کہ فجری مرر دے علاقے وچ کھولیا گیا سی۔ سارہ دا کاروبار اینا کِھلریا کہ اک مہینے وچ ای 10000درہم کما لئے۔ اوہدے مگروں پہلے مرسڈیز مُل لئی۔ سارہ دا کہنا اے کہ اوہنے بڑیاں کوششاں مگروں امارات وچ ہوٹل کھولے۔ ارباں رُپئے دی مالک سارہ نوں آپ پتا نہیں سی کہ اوہ اک دن اینی وڈی تے امیر سوانی ہووے گی۔ سارہ دا کہنا اے کہ جے دبئی وچ تسیں قانونی طریقے نال کم کردے او تے کوئی وی تہانوں پریشان نہیں کرے گا تے کامیابی وی ملے گی۔
