لاہور(پاکستان پوائنٹ نیوز22۔دسمبر2016ء) باکسنگ وچ پاکستان دا ناں روشن کرن والے محمد وسیم حکومت دے روایتی ہتھکنڈیاں دا شکار ہو گئے۔ تفصیل دے مطابق کرکٹ، ہاکی تے سکواش دے بعد باکسنگ وچ پاکستان نوں عالمی ٹائٹل دوان والے محمد وسیم نے پچھلے مہینے ڈبلیو بی سی سلور کیٹیگری وچ اپنے اعزاز دا کامیابی نال دفاع کر کے پوری دنیا وچ ملک دا ناں روش کیتا، جہدے بعد وزیر اعظم نواز شریف ولوں اوہناں لئی 3کروڑ رُپئے انعام دا اعلان کیتا گیا سی پر باکسر دا کہنا اے کہ حکومت اوہناں نوں پیسے دین وچ سستی وکھا رہی اے۔
محمد وسیم دے مطابق حکومتی عہدیداراں دا کہنا اے کہ انعامی رقم اوہناں دی بجائے اوہناں دے پروموٹرز نوں دِتی جائے گی جہدے لئی سمری وزیر اعظم نوں گھلی گئی اے۔ باکسر دا کہنا اے کہ اوہناں نے اجے تیکر ساریاں کامیابیاں اپنی مدد آپ دے تحت حاصل کیتیاں نیں، حکومت نے کئی وار اوہناںدی امداد دا وعدا کیتا جو پورا نہیں ہو سکیا ۔ اوہناں دا کہنا سی کہ ایہناں ساریاں اوکڑاں دے مگروں آن والے ویلے وچ اعزاز اکٹھے کرن لئی پر عزم نیں۔
