لیونل میسی گروئن انجری دا شکار‘ 3 ہفتیاں لئی میدان توں باہر

بار سلونا (پاکستان پوائنٹ نیوز۔26ستمبر 2016) لیونل میسی گروئن انجری دا شکار ہو کے 3 ہفتیاں لئی میدان توں باہر ہو گئے۔ تفصیلات مطابق بار سلونا فٹ بال کلب ولوں کھیڈن والے لیونل میسی اٹلیٹکو میڈرڈ خلاف میچ دوران گروئن انجری دا شکار ہو گئے۔ بار سلونا فٹبال کلب نے اوہناں دی انجری دی تصدیق کر دِتی اے۔ اہم میچاں وچ رلت نہیں کر سکن۔ دوجے پاسے ارجنٹائن دے فٹبال کوچ نے بار سلونا نُوں میسی دا خیال نہ رکھن اُتے شدید تنقید دا نشانا بنایا اے۔ اوہناں دا کہنا اے کہ زخمی ہون کارن میسی ہُن ورلڈ کپ کوالیفائرز دے میچاں وچ پیرو تے پیرا گوئے خلاف نہیں کھیڈ سکن گے۔ خیال رہوے کہ لیونل میسی ارجنٹائن دی قومی ٹیم دی نمایندگی کردے نیں پر کلب فٹبال وچ اوہ بار سلونا ولوں کھیڈدے نیں۔