کراچی(پاکستان پوائنٹ نیوز17۔جنوری2017ء) جوڈیشل مجسٹریٹ شرقی دی عدالت وچ قومی کرکٹ ٹیم دے سابق کپتان وسیم اکرم نے گڈی اُتے فائرنگ بارے کیس وچ ملزماں نال کیتا گیا صلح ناما جمع کروا دِتا اے۔ تفصیل دے مطابق لیجنڈری فاسٹ باﺅلر دی گڈی اُتے فائرنگ بارے کیس دی سنوائی جوڈیشل مجسٹریٹ شرقی دی عدالت وچ ہوئی جتھے اوہناں دے منیجر نے عدالت نوں دسیا کہ وسیم اکرم نے ملزماں نال صلح کر لئی اے، سابق کپتان دے پیش نہ ہون اُتے عدالت نے ریمارکس دِتے کہ وسیم اکرم نوں بلاﺅ نہیں تے تفتیشی افسر اوہناں نوں گرفتار کر کے لیان گے، تھوڑی ای دیر بعد وسیم اکرم نے عدالت وچ پیش ہو کے صلح ناما جمع کرا دِتا جہنوں عدالت نے منظور کردے ہوئے مقدما خارج کر دِتا۔
یاد رہوے کہ 6اگست 2015نوں کراچی دے نیشنل کرکٹ سٹیڈیم وچ جاری نوجوان فاسٹ باﺅلرز دے تربیتی کیمپ دی سربراہی لئی آن والے وسیم اکرم دی گڈی نوں کارساز روڈ اُتے حادثا پیش آیا سی۔
