پاکستانی ٹیم نے برسبین ٹیسٹ وچ جسراں نشانے دا پِچھا کیتا ، اوہ سلاہن جوگ اے: بریٹ لی

گرین شرٹس دی پرفارمنس دے بعد میں سکھیا، سانوں کسے وی ٹیم نوں آسان نہیں سمجھنا چاہیدا: آسٹریلوی سابق فاسٹ باﺅلر

سڈنی(پاکستان پوائنٹ نیوز29۔دسمبر2016ء) آسٹریلوی ٹیم دے سابق باﺅلر بریٹ لی نے پاکستانی کھڈاریاں دی کارکردگی دی تعریف کردے ہوئے آکھیا کہ اوہ میچ دے آخیرلے ویلے تیکر ہار نہیں مننے، برسبین ٹیسٹ وچ پاکستانی ٹیم جس انداز نال کھیڈی تے جس طرحاں ہدف دا پچھا کردے ہوئے کارکردگی وکھائی اوہنے سٹیون سمتھ نوں پریشان کر دِتا سی۔ اک سپورٹس ویب سائٹ اُتے لکھ گئے آرٹیکل وچ اوہناں نے آکھیا کہ ایس صورتحال وچ اوہناں نے اک سبق لکھیا اے اوہ ایہ کہ کدی کسے ٹیم نوں آسان نہ سمجھو، خاص طور اُتے اوس ویلے جدوں اوہ مصباح الحق دی قیادت وچ کھیڈن والی ٹیم ہووے۔

سابق آسٹریلوی فاسٹ باﺅلر دا کہنا سی کہ برسبین ٹیسٹ دی پہلی اننگز وچ جدوں پاکستانی ٹیم صرف 142سکور اُتے آﺅٹ ہو گئی تے میرا تجزیا ایہ سی کہ ایہ میچ تن دن وچ ختم ہو جائے گا۔ میں ایہ تجزیا پاکستانی ٹیم دے ماضی وچ کیتے گئے آسٹریلیا دے دوریاں نوں نظر وچ رکھدے ہوئے کیتا سی جہدے وچ پاکستانی ٹیم نوں ہمیشہ دی آسٹریلین وکٹاں اُتے اوکڑاں دا ساہمنا کرنا پیندا سی پر برسبین ٹیسٹ وچ پاکستانی کھڈاریاں دی شاندار کارکردگی دے بعد میں اپنے آپ توں پُچھیا کہ میں ایس ٹیسٹ توں کیہ سبق سکھیا اے؟ بریٹ لی نے آکھیا کہ پاکستانی کھڈاریاں دی پرفارمنس دے بعد میں سکھیا کہ سانوں کسے وی ٹیم نوں آسان نہیں سمجھنا چاہیدا، خاص طور اُتے ایسی ٹیم جو اپنی قوم دے خاباں تے امیدداں دی نمائندگی کر رہی ہووے تے آخری سیریز وچ وی آسٹریلیا نوں ہرا چکی ہووے۔

سابق سٹار دا پاکستانی بلے بازاں دی تعریف کردے ہوئے کہنا سی کہ اوہناں نے برسبین ٹیسٹ وچ ہدف دا جس طرحاں پچھا کیتا تے اپنے آپ نوں جت دے نیڑے کیتا اوہ سلاہن جوگ اے۔اوہناں دا کہنا سی کہ میرے خیال مطابق پاکستانی نوجواناں نے جس حوصلے تے اعتماد نال مقابلا کیتا تعریف جوگ اے۔