بھارت آئی سی سی ایونٹس وچ ساڈے نال کھیڈن توں انکارنہیں کر سکدا، آن والے ورھے وڈی ٹیم پاکستان آئے گی: نجم سیٹھی

بھارت آئی سی سی ایونٹس وچ ساڈے نال کھیڈن توں انکارنہیں کر سکدا، آن والے ورھے وڈی ٹیم پاکستان آئے گی: نجم سیٹھی

لاہور(پاکستان پوائنٹ نیوز20۔دسمبر2016ء) پاکستان کرکٹ بورڈ ایگزیکٹو کمیٹی دے چیئرمین نجم سیٹھی دا کہنا اے کہ بھات انٹرنیشنل کرکٹ کونسل دے آہر ہیٹھ ہون والے ایونٹس وچ ساڈے نال کھیڈن توں انکار نہیں کر سکدا، اگلے ورھے وڈی ٹیم پاکستان آئے گی۔ تفصیل دے مطابق میڈیا نال گل بات کردے ہوئے نجم سیٹھی دا کہنا سی کہ آئی سی سی دے آہر ہیٹھ ہون والے ایونٹس وچ بھارت تے پاکستان وچکار میچاں توں سبھ توں زیادا آمدنی ہوندی اے ایس لئی آئی سی سی ایونٹ وچ بھارت ساڈے نال کھیڈن توں انکار نہیں کر سکدا کیوں جے انکار کرن اُتے اوہنوں وی ڈاڈھا نقصان ہووے گا۔

نجم سیٹھی دا کہنا سی کہ آن والے ورھے وڈی ٹیم پاکستان آئے گی تے مہمان ٹیم لاہور وچ میچ کھیڈے گی، پاکستان سپر لیگ دا فائنل لاہور وچ کروان لئی تیاری کر لئی اے، دعا اے کہ حالات ٹھیک رہن۔ نجم سیٹھی دا کہنا سی کہ مصباح الحق پاکستان دا اثاثا نیں اوہ اپنے کیریئر دا فیصلا آپ کرن گے، آسٹریلیا خلاف پاکستان نے شاندار کارکردگی نال کم بیک کیتا۔