دورا افریقا : سری لنکا نے سوئنگ دے سلطان وسیم اکرم دیاں خدمتاں حاصل کر لئیاں

دورا افریقا : سری لنکا نے سوئنگ دے سلطان وسیم اکرم دیاں خدمتاں حاصل کر لئیاں

کولمبو(پاکستان پوائنٹ نیوز01۔دسمبر2016ء) سری لنکا کرکٹ بورڈ نے ٹیم دے اگلے مہینے جنوبی افریقا خلاف ہون والے دورے دیاں تیاریاں لئی پاکستان دے سابق کپتان وسیم اکرم دیاں خدمتاں حاصل کر لئیاں نیں۔ تفصیل دے مطابق جمعرات نوں وسیم اکرم کولمبو وچ اک دِنا کوچنگ کلینک دا انعقاد کرن گے۔ سری لنکن کرکٹ بورڈ دے سربراہ تھیلانگا سوما تھیپالا دا کہنا سی کہ وسیم اکرم نے ساڈے منصوبے دا حصہ بنن دی دعوت قبول کر لئی اے جو ساڈے لئی فخر دی گل اے۔

سوما تھیپالا نے آکھیا کہ جے سری لنکن ٹیم دی چنگی طرحاں رہنمائی کیتی گئی تے اوہ ورلڈ کپ 2019جِت سکدی اے۔ یاد رہوے کہ سری لنکا نے 1996دے ورلڈ کپ وچ جو کہ لاہور وچ ہویا سی، نوں جِت کے چیمپیئن بنن دا اعزاز حاصل کیتی سی جدکہ 2007تے 2011دے دوویں عالمی کپ دے فائنل تیک رسائی حاصل کیتی سی۔ سری لنکن کرکٹ بورڈ نے ٹیم دے زمبابوے دے کامیاب دورے دے بعد تربیتی سیشن دا اہتمام کیتا اے جدکہ ٹیم نے زمبابوے وچ ہون والی تن میچاں دی سیریز وچ کامیابی توں پہلے میزبان ٹیم خلاف دو ٹیسٹ میچاں دی سیریز وچ وی کامیابی حاصل کیتی سی جدکہ سری لنکا کرکٹ ٹیم اگلے مہینے جنوبی افریقا دے دورے اُتے جائے گی جتھے اوہ 3ٹیسٹ، 5ون ڈے تے 3ٹی ٹونٹی میچ کھیڈے گی جدکہ سیریز 26دسمبر توں شروع ہووے گی۔

جنوبی افریقا دے مشکل دورے نوں ویکھدے ہوئے بورڈ نے وسیم اکرم ورگے وڈے کھڈاری دیاں خدمتاں لین دا فیصلا کیتا اے۔ وسیم اکرم نوں پاکستان ولوں ٹیسٹ تے ون ڈے کرکٹ وچ سبھ توں زیادا وکٹاں لین دا اعزاز وی حاصل اے۔ اوہناں نے ٹیسٹ وچ 414تے ون ڈے دے 356میچاں وچ 502وکٹاں لئیاں نیں۔سری لنکا دے ہیڈ کوچ گراہم فورڈ نے ٹیم نوں خبردار کیتا اے کہ جنوبی افریقا خلاف سخت چیلنج دا ساہمنا ہووے گا۔ یاد رہوے کہ سری لنکا نے چالو ورھے اگست وچ عالمی چیمپیئن آسٹریلیا نوں تن میچاں دی ٹیسٹ سیریز وچ وائٹ واش کیتا سی جو اک ریکارڈ اے۔ ٹیسٹ کرکٹ وچ دو بہترین سیزیز دے مگروں وی سری لنکن ٹیم دا درجا بندی دے لحاظ نال7واں نمبر جدکہ جنوبی افریقا دی ٹیم دا 5واں نمبر اے۔