بھارت کرکٹ بورڈ وی سچن توں تنگ آ چُکیا سی،سچن ٹنڈولکر ریٹائرمنٹ دا اعلان نہ کردے تے ٹیم توں ڈراپ کر دینا سی : سابق چیف سلیکٹر

ممبئی (پاکستان پوائنٹ نیوز۔28ستمبر 2016) بھارتی کرکٹ ٹیم دے سابق چیف سلیکٹر سندیپ پاٹل نے اِک انٹرویو وچ انکشاف کیتا اے کہ جے 2012 وچ سچن ٹنڈولکر ریٹائرمنٹ دا اعلان نہ کردے تے اوہناں نُوں اِک دِنا ٹیم توں ڈراپ کر دِتا جاندا۔ ٹنڈولکر دی ریٹائرمنٹ ویلے میڈیا وچ اوس ویلے کافی قیاس آرائیاں کیتیاں گئیاں کہ سلیکٹرز نے سابق عظیم بلے باز اُتے ریٹائرمنٹ لئی دباء پایا سی۔ سندیپ پاٹیل نے مراٹھی چینل نُوں انٹرویو وچ دسیا کہ 12 دسمبر 2012 وچ اسیں سچن نال ملے تے اوہناں توں مستقبل دے منصوبیاں بارے پُچھیا تے اوہناں نے کہیا کہ حالے اوہناں دا ریٹائرمنٹ دا کوئی ارادا نہیں پر سلیکشن کمیٹی سچن دے بارے وچ متفقا فیصلا کر چکی سی تے بورڈ نُوں وی ایہدے بارے وچ دس دِتا سی۔