لاہور(پاکستان پوائنٹ نیوز21۔فروری2017ء) پاکستان کرکٹ بورڈ (پی سی بی) دے چیئرمین شہریار خان دا کہنا اے کہ کرکٹ بورڈ پاکستان سپر لیگ دا فائنل لاہور وچ کروان دا فیصلا کر چکیا اے، ہن دھمکیاں نال سانوں بلیک میل نہیں کیتا جا سکدا اے۔ تفصیل دے مطابق میڈیا نال گل بات کردے ہوئے شہریار خان دا کہنا سی کہ پاکستان سپر لیگ دا فائنل لاہور وچ ہونا چنگی گل اے، جے فائنل کامیابی نال لاہور وچ ہو گیا تے سارے ملکاں نوں چنگا پیغام جائے گا۔
شہریار خان دا ہور کہنا سی کہ سانوں پاکستان سپر لیگ دا فائنل لاہور وچ کروان دی راہ وچ آن والیاں اوکڑاں دا پتا اے پر غیر ملکی کھڈاری سکیورٹی لئی حکومت، پولیس رینجرز تے انٹیلی جنس سبھ دا تعاون ہے اے، پی ایس ایل دا فائنل لاہور وچ کروانا سکیورٹی رسک ضرور اے پر ساڈے سکیورٹی ادارے بہتر انتظامات کرن گے۔ اوہناں دا کہنا سی کہ قذافی سٹیڈیم دے فار اینڈ پویلین دی تیاری دا کم وی فائنل مرحلے وچ اے۔
چیئرمین پی سی بی دا ہور کہنا سی کہ غیر ملکی پلیئرز نوں پی ایس ایل فائنل وچ رلت لئی راضی کرن لئی چیئرمین پی ایس ایل نجم سیٹھی دبئی وچ نیں۔ اوہناں دا کہنا سی کہ کئی غیر ملکی کھڈاری پاکستان آن گے، آن والے کھڈاریاں نوں وی آئی پی سکیورٹی ملے گی۔ شہریار خان دا کہنا سی کہ آن والے کُجھ دِناں وچ ٹکٹاں ویچن دا شیڈول جاری کر دیاں گے۔ اوہناں دا کہنا سی کہ ٹکٹاں تے کمپلیمنٹری پاسز لئی بڑے فون آ رہے نیں۔
