اوم پوری دی موت :کیس نے نواں موڑ لے لیا

اوم پوری دی موت :کیس نے نواں موڑ لے لیا

ممبئی(پاکستان پوائنٹ نیوز10۔جنوری2017ء)بالی ووڈ دے مشہور اداکار اوم پوری دے دوست ولوں پولیس نوں دِتے گئے بیان دے بعد کیس نے نواں موڑ لے لیا اے، پولیس نے اداکار دی سابقا بیوی نوں وی بیان لئی سَد لیا۔ تفصیل دے مطابق مڈھلی پوسٹ مارٹم رپورٹ وچ انکشاف کیتا گیا اے کہ مشہور اداکار اوم پوری دی موت طبعی نہیں سی بلکہ اوہناں دی موت دی وجہ کُجھ ہور سی۔

اوم پوری دی ہارٹ اٹیک نال موت مشکوک ہوندی جا رہی اے جدکہ کیس وچ ہون نواں موڑ آ گیا اے۔ اداکار دی مڈھلی پوسٹ مارٹم رپورٹ دے مطابق اوم پوری دے سِر وچ ڈیڈھ انچ ڈونگھے زخم دا نشان تے تھاں تھاں بلڈ کلاٹنگ سی جہدے بعد اوم پوری نال موت توں پہلے موجود دوست ہدایتکار تے اوہناں دے ڈرائیور مشرا توں تفتیش کرن دا فیصلا کیتا گیا اے۔بھارتی میڈیا دے مطابق اوم پوری دی موت دے معاملے وچ ہدایتکار خالد قدوائی نے پولیس نوں دسیا کہ اوم پوری سابقا بیوی نال ملن جدوں اوہناں دے گھر گئے تے سٹیل دے گلاس وچ شرب لے کے گئے سن پر گھر وچ سابقا بیوی نال لڑائی دے بعد واپس نکلے تے اوہناں دے ہتھ وچ شیشے دا گلاس سی۔

ہدایتکار دے بیان مگروں پولیس نے اوم پوری دی سابقا بیوی دے گھر دوالے موجود سی سی ٹی وی فوٹیج لے لئی اے جہدے بعد خالد قدوائی دے بیان دی تصدیق ہو گئی اے جدکہ پولیس ولوں نندتا نوں وی تفتیش لئی تھانے بُلایا گیا سی پر اوہناں آن توں انکار کر دِتا۔ دوجے پاسے اوم پوری دی سابقا بیوی نندتا نے اداکار دے تن بنک اکاﺅنٹ وی منجمد کرا دِتے نیں جہدے بعد اداکار دے ملازماں نوں تنخاہواں وی جاری نہیں ہو سکیاں۔ یاد رہوے کہ تن دن پہلے اوم پوری گھر وچ مردا حالت وچ لبھے۔ اوہناں دی موت دی وجہ ہارٹ اٹیک قرار دِتی گئی سی پر ابتدائی پوسٹ مارٹم دے بعد پولیس نے معاملے دیاں تحقیقات شروع کر دِتیاں نیں۔