بھارتی کامیڈین کپل شرما دے پاکستانی چاہیوان نے مایوسی وچ اپنی ڈگری ساڑ دِتی

لاہور(پاکستان پوائنٹ نیوز06۔جنوری2017ء) انج تے چاہیوان اپنے ستاریاں نال ملن لئی کجھ وی کرلیندے نیں پر مشہور بھارتی کامیڈین کپل شرما دے اک پاکستانی چاہیوان دا ویڈیو پیغام سوشل میڈیا اُتے ڈاڈھا مشہور ہو رہیا اے جہنے اوہناں نال ملاقات نہ ہون دی وجہ توں اپنی ڈگری ساڑ دِتی۔ تفصیل دے مطابق کپل شرما دے پاکستانی چاہیوان نے اپنے ویڈیو پیغام وچ آکھیا کہ میں تہاڈا بہت وڈا چاہیوان آں۔ میں تہاڈے نال ملن دی بہت کوشش کیتی، تہانوں پیغام وی گھلے پر تُسیں کوئی جواب نہیں دِتا تے مینوں تہاڈے ایہ عادت چنگی نہیں لگی۔ کپل شرما دے چاہیوان نے اوہناں نال ملاقات دی خاہش پوری نہ ہون اُتے مایوسی دا وکھالا کردے ہوئے ویڈیو پیغام وچ اپنی ڈگری ساڑ دِتی۔ کپل شرما دے پاکستانی چاہیوان دا کہنا سی کہ میری بس اینی خاہش اے کہ اک وار تہاڈے پروگرام وچ آ کے، تہاڈے نال ملاقات کراں۔چاہیوان دا ویڈیو پیغام تُسیں وی سنو!