اسلام آباد(پاکستان پوائنٹ نیوز17۔جنوری2017ء) برطانوی ہائی کمشنر تھامس ڈریو نے میڈیا نال گل بات کرد ے ہوئے آکھیا کہ چالو ورھے پاکستان تے برطانیا وچکار اعلا سطحی دورے ہون گے۔ اوہناں نے آکھیا کہ چالو ورھا امید دا سال اے تے سانوں ایہ وی امید اے کہ حکومت لاپتا بندیاں نوں رہا کروائے گی۔ برطانوی ہائی کمشنر نے آکھیا کہ پاکستان تے برطانیا وچکار 7دہاکیاں توں اک تعلق قائم اے جہنوں ہور اگانہ ودھایا جائے گا۔
میڈیا نال گل بات وچ تھامس نے دہشت گردی خلاف پاک فوج دیاں کوششاں دی وی تعریف کیتی تے آکھیا کہ دہشت گردی خلاف جنگ وچ پاکستانیاں دیاں قربانیاں ذکر جوگ نیں۔ اوہناں نے آکھیا کہ آپریشن ضرب عضب نال سکیورٹی صورتحال بہترہوگئی اے تے ہن پاکستان وچ جمہوریت دا مستقبل وی روشن اے۔ پاک چین اقتصادی راہداری منصوبے بارے تھامس ڈریو نے آکھیاکہ سی پیک وچ شامل ہون دی پیشکش اجے موجود اے۔ برطانیا سی پیک وچ شامل ہون نوں تیار اے۔ اوہناں دا کہنا سی کہ سی پیک وچ شامل ہونا برطانیا لئی چنگی گل ہووے گی۔
