اسلام آباد(پاکستان پوائنٹ نیوز17۔جنوری2017ء) سپریم کورٹ وچ پاناما لیکس بارے درخاستاں دی سنوائی دا سلسلا جاری اے۔ تفصیل دے مطابق سنوائی وچ وقفے دوران میڈیا نال گل بات کردے ہوئے پی ٹی آئی رہنما فواد چودھری نے آکھیا کہ مخدوم علی خان نے وزیر اعظم دے استثنی اُتے دنیا بھر دے قوانین پیش کیتے۔ عدالت نے آکھیا کہ وزیر اعظم نے اسمبلی وچ جو تقریر کیتی اوہدیاں تفصیلاں دَسو، استثنی اوس ویلے منگیا جاندا اے جدوں جھوٹھ بولیا جائے۔
فواد چودھری نے آکھیا کہ مریم نواز نوں ٹرسٹی کیوں ظاہر کیتا گیا؟ پہلا سوال ایہ اے کہ 1993وچ فلیٹ مُل لئے گئے تے پیسے کتھوں آئے؟ اوہناں نے آکھیا کہ ایہناں سوالاں اُتے اک لفظ وی نہیں آکھیا جا رہیا جدکہ سارا زور ایہدے اُتے دِتا جا رہیا اے کہ وزیر اعظم نوں استثنی حاصل اے۔ فواد چودھری نے دسیا کہ سپریم کورٹ وچ اج وزیر اعظم دے وکیل مخدوم علی خان دے سارے دلائل پارلیمنٹ دے استحقاق اُتے سن۔
کل رات تک سارے لوک آکھ رہے سن کہ وزیر اعظم استثنی نہیں لے رہے۔ سارے پارلیمنٹیرین نوں ایس گل دا نوٹس لینا چاہیدا کہ وزیراعظم نے پارلیمنٹ وچ جھوٹھ بولیا۔ فواد چودھری نے آکھیا کہ وزیر اعظم دے وکیل نے سارے دلائل آرٹیکل 66اُتے دِتے، وزیر اعظم دا وکیل آکھدا اے کہ تقریر وچوں ثبوتاں تے اثاثیاں دی گل کڈھ دو۔ عدالت نے آکھیا کہ وزیر اعظم دی تقریر نوں ثبوت دے طور اُتے پیش کیتا جا رہیا اے۔
استثنی منگیاای اوس ویلے جاندا اے جدوں تُسیں جھوٹھ بولو۔ ایس توں وکھ میڈیا نال گل بات کردے ہوئے پی ٹی آئی رہنما شاہ محمود قریشی نے آکھیا کہ 3دن توں وزیر اعظم دے وکیل پارلیمنٹ دا سہارا لے رہے نیں۔ شاہ محمود قریشی دا کہنا سی کہ وزیر اعظم ہاﺅس دی پریس ریلیز آکھ رہی اے کہ اوہ استثنی نہیں لے رہے۔ اوہناں نے آکھیا کہ مخدوم علی عدالت وچ پارلیمانی استثنی دی گل کر رہے نیں۔ استحقاق بزنس اُتے تے ہو سکدی اے، کرپشن اُتے نہیں۔ اوہناں دا کہنا سی کہ حکومتی وکیل آکھنا چاہندا اے کہ پارلیمنٹ وچ غلط بیانی چلدی اے، وزیر اعظم دے وکیل نے دو کیساں دا حوالا دِتا۔ اوہناں دا کہنا سی کہ حکومت کول کُجھ نہیں، حکومت جس اُتے پردے پچھے لُکنا چاہندی اے اوہ چُکیا گیا اے۔
