اسلام آباد(پاکستان پوائنٹ نیوز16۔جنوری2017ء) اسلام آباد وچ اُستانی نال محبت وچ ناکامی اُتے 7ویں جماعت دے پڑھیار نے کلاس وچ ای اپنی جان لے لئی۔ تفصیل دے مطابق اسلام آباد دے دوالی علاقے ترنول دے اک سکول وچ 7ویں جماعت دا پڑھیار اُسامہ اپنی اُستانی دی محبت وچ گرفتار ہو گیا۔ اُسامہ دی اُستانی نوں جدوں ایس گل دا پتا چلیا تے اوہنے اُسامہ نوں سمجھان دی کوشش کیتی جہدے اُتے اُسامہ دُکھی ہو گیا تے اوہنے اپنی زندگی نوں ختم کرن دا فیصلا کیتا تے اپنے والد دا 30بور دا پستول ورتدے ہوئے کلاس دے ساہمنے ای اپنے آپ نوں ڈھڈ وچ گولی مار لئی۔
خدکشی کرن توں پہلے اُسامہ نے اک خط وچ لکھیا ، خط وچ اوہنے سکول دے پرنسپل توں درخاست کیتی کہ اوہدے پستول نوں کیتے دور سُٹ دِتا جائے کیونکہ اوہ نہیں چاہندا کہ اوہدی وجہ توں اوہدے گھر والیاں نوں تکلیف ہووے یاں اوہ گرفتار ہون۔ پولیس نے اُسامہ دی لاش نوں قبضے وچ لے کے سکول انتظامیا تے اُسامہ دے گھر توں تفتیش شروع کر دِتی اے۔
