اسلام آباد(پاکستان پوائنٹ نیوز16۔جنوری2017ء) قومی اخبار ایکسپریس وچ چھپن والی اک رپورٹ وچ دسیا گیا کہ آرمی چیف جنرل قمر جاوید باجوہ دے پچھلے دِنا ای دِتے گئے اک بیان نے وزیر اعظم ہاﺅس وچ بے چینی پیدا کر دِتی اے۔ تفصیل دے مطابق پچھلے ہفتے آرمی چیف ولوں دِتا گیا بیان قومی اخباراں دی سُرخی بنیا جہدے بعد وزیر اعظم ہاﺅس وچ ڈاڈھی بے چینی پائی گئی۔
آرمی دا چیف دا ایہ بیان حکومت تے اسٹیبلشمنٹ وچکار ودھدی ہوئی بے چینی دا مونہوں بولدا ثبوت اے۔یاد رہوے کہ کھاریاں گیریژن دے دورے دوران آرمی چیف جنرل قمر جاوید باجوہ نے بیان دِتا سی کہ پاک فوج دے وقار اُتے کوئی سمجھوتا نہیں کیتا جائے گا۔ اخبار وچ چھپن والی رپورٹ دے مطابق وسیلیاں دا کہنا اے کہ آرمی چیف ولوں ایس طرحاں دا بیان فوجی حکام ولوں ڈان لیکس دے جھیڑے تے فوجی عدالتاں دے معاملے اُتے رانا ثناءاللہ دی تنقید بارے اک سوال دے جواب وچ دِتا گیا سی۔
رپورٹ وچ دسیا گیا کہ وزیر اعظم نواز شریف نے حکومت تے فوج وچکار ودھدی ہوئی بے چینی تے اختلافات نوں ختم کرن لئی اپنے قریبی ساتھیاں نال مشورا کرنا شروع کر دِتا اے۔ نواز شریف نے پارٹی رہنماواں نوں خبردار کیتا اے کہ اوہ مرکزی قیادت دی اجازت دے بغیر فوج بارے کوئی بیان نہ دین۔ ایتھوں تک کہ حکمران جماعت نے اپنے لیڈرز نوں وی فوج مخالف ایسے بیان دین توں روک دِتا اے جہدے نتیجے وچ اختلافات پیدا ہون دا خدشا ہووے۔
مسلم لیگ (ن) دے وسیلیاں مطابق ٹی وی ٹاک شوز وچ وی ہر لیڈر یاں رہنما رلت نہیں کر سکے گا۔ مسلم لیگ ن دا ایہ خیال سی کہ آرمی چیف جنرل (ر) راحیل شریف دے جاندے ای ڈان لیکس دا معاملا ٹھنڈا ہو جائے گا پر اوہ غلط سن کیونکہ آرمی چیف جنرل قمر جاوید باجوہ دے ایس بیان نے مسلم لیگ (ن) نوں پریشان کر دِتا اے۔ سکیورٹی اسٹیبلشمنٹ پچھلے ورھے ڈان وچ چھپن والی اک خبر نوں دبان دی حکومتی کوششاں توں رُسی اے۔
فوج دا مَننا اے کہ ڈان لیکس وچ سکیورٹی بارے اجلاس دی خبر فوج نوں بدنام کرن لئی حکومت ولوں چھپوائی گئی سی۔ فوج ولوں ڈاڈھا ردعمل اُتے ای حکومت نے وزیر اطلاعات پرویز رشید کولوں وزارت واپس لے کے خبر چھپوان بارے تحقیقات دا حکم دِتا سی۔ بعد وچ ایہ خبراں وی گھم رہیاں سن کہ وزیر اعظم ہاﺅس وچ موجود بیورو کریٹس وی معطلی دی فہرست وچ شامل نیں پر انج کُجھ نہیں ہو سکیا۔
نومبر وچ حکومت نے معاملے دیاں تحقیقات کرن تے ذمے واراں دا تعین کرن لئی جسٹس (ر) عامر رضا خان دی سربراہی وچ اک سَت رکنی کمیٹی نا دِتی۔ پر پتا چلیا کہ عامر رضا خان دے شریف خاندان نال قریبی تعلقات نیں تے ایس کمیٹی ولوں وی کوئی تحقیقات ساہمنے نہیں آ سکیاں۔ اندرونی وسیلیاں دے مطابق جے اسٹیبلشمنٹ نے دَبن تے ایس معاملے نوں دَبان توں انکار کر دِتا تے کسے نہ کسے نوں قربانی دا بکرا بنایا جا سکدا اے تے ایس معاملے وچ سرکاری ملازماں دی قربانی دے بہت امکانات نیں۔
ایس ضمن وچ وزیر اعظم ہاﺅس دے ترجمان مصدق ملک نال وی راطبا کرن دی کوشش کیتی گئی پر اوہناں نے کالز تے میسجز دا کوئی جواب نہیں دِتا۔ نواز شریف دے مشیر امیر مقام نے ایس حوالے نال اپنے بیان وچ آکھیا کہ کُجھ مسائل تے معاملات نوں خاص تناظر وچ ویکھن دی لوڑ اے۔ اپنے بیان دی وضاحت کیتے بغیر اوہناں نے حکومت تے فوج وچکار کسے اختلافات یاں بے چینی دیاں خبراں نوں رَد کیتا۔
