میڈیا وچ جو وی گلاں تے غلط بیانی کیتی گئی جنرل راحیل شریف اوہدے اُتے ڈاڈھے دُکھی نیں: امجد شعیب

حکومت نے اجازت دے وی دِتی تے جنرل (ر) راحیل شریف کدی وی اپنی شرط پوری ہوئے بغیر سعودی عرب نہیں جان گے: تجزیا کار امجد شعیب دی گل بات

میڈیا وچ جو وی گلاں تے غلط بیانی کیتی گئی جنرل راحیل شریف اوہدے اُتے ڈاڈھے دُکھی نیں: امجد شعیب
حکومت نے اجازت دے وی دِتی تے جنرل (ر) راحیل شریف کدی وی اپنی شرط پوری ہوئے بغیر سعودی عرب نہیں جان گے: تجزیا کار امجد شعیب دی گل بات

راولپنڈی(پاکستان پوائنٹ نیوز12۔جنوری2017ء) نجی ٹی وی چینل دے اک پروگرام وچ گل بات کردے ہوئے تجزیا کار امجد شعیب دا کہنا سی کہ پچھلے دِنا ای میری راحیل شریف نال گل ہوئی۔ گل بات دوران اوہناں نے مینوں آکھیا کہ اسلامی فوجی اتحاد دی سربراہی متعلق میرے بارے میڈیا وچ جو وی گلاں ہوئیاں تے جو غلط بیانی کیتی گئی اوہدے اُتے ڈاڈھا دُکھ ہویا۔ اوہناں نے آکھیا کہ کسے نے میرے بارے کُجھ آکھیا تے کسے نے کُجھ ریمارکس لکھے کہ میں ریالاں بدلے وِک گیا۔

امجد شعیب نے دسیا کہ راحیل شریف اپنے بارے میڈیا وچ آن والیاں گلاں اُتے دُکھی نیں۔ امجد شعیب دا کہنا سی کہ ایس اتحاد بارے کسے نوں کوئی پتا نہیں تے بغیر کُجھ جانے ہر اک نے بیان دینا شروع کر دِتا۔ اوہناں دا کہنا سی کہ ایس سارے معاملے دا ملبا راحیل شریف اُتے پان دی کوشش کیتی گئی جو کہ مذمت جوگ اے۔ امجد شعیب نے آکھیا کہ ایہ ساری کنفیوژن ساڈے وزیر دفاع دے بیان دی وجہ توں پیدا ہوئی، اوہناں دے بیان دی وجہ توں میڈیا وچ سمجھیا گیا کہ ایہ کم ہو گیا اے۔

راحیل شریف نے مینوں ایہ وی آکھیا کہ میں تے ملک خاطر سارا کم کیتا، جے حکومت اجازت دیوے گی فیر ای میں سعودی عرب جاواں گا۔ امجد شعیب نے دسیا کہ حکومت دی اجازت مگروں جے راحیل شریف دیاں اپنیاں تن شرطاں نوں پورا نہ کیتا گیا تے فیر اوہ اسلامی فوجی اتحاد دے سربراہ دی کمان نہیں سنبھالن گے۔ ایس توں پہلے اک نجی ٹی وی چینل نال گل بات کردے ہوئے شعیب امجد نے دسیا کہ سابق آرمی چیف نے اسلامی فوجی اتحاد دے سربراہ دا عہدا قبول کرن توں پہلے سعودی عرب ساہمنے تن شرطاں رکھیاں سن۔

اوہناں وچ سبھ توں اہم شرط سی کہ ایس اتحاد وچ ایران نوں شامل کیتا جائے۔ دوجی شرط ایہ سی کہ اوہ کسے دی کمان انڈر کم نہیں کرن گے جدکہ تیجی شرط ایہ سی کہ اوہ اسلامی ملکاں وچ صلح کروان لئی کردار ادا کرن گے۔