لاہور(پاکستان پوائنٹ نیوز12۔جنوری2017ء) بھارت نے پہلی وار پاکستان کولوں کنک منگ لئی، تاجراں نے وی محکما خوراک پنجاب نال رابطے شروع کر دِتے نیں۔ بھارتی تاجراں نے واہگہ راہیں 5توں 10لکھ ٹن کنک مُل لین لئی محکما خوراک پنجاب نال رابطا کیتا اے جدکہ محکما خوراک پنجاب نے تاجراں ولوں کنک دی قیمت 165ڈالر فی ٹن کرن دے مطالبے نوں رَد کردے ہوئے آکھیا اے کہ ایکسپورٹ تے کنک ویچن دی قیمت بارے حکومتی منظوری ملن دی صورت وچ ’اخباری محکمے‘ وچ دلچسپی دے وکھالے دا اشتہار دتا جائے گا ،فیر جو وی بندے حکومتی قیمت تے قاعدے مطابق بھارت ایکسپورٹ لئی کنک مُل لینا چاہن اوہناں نوں کنک ’محکما خوراک‘ ویچے گا۔
محکما خوراک ولوں بھارتی آفر بارے بریفنگ دے بعد چیف سیکرٹری نے کیبنٹ کمیٹی دا اجلاس سَدن دی ہدایت کیتی اے۔ ایس توں وکھ فلور ملز ایسوسی ایشن نے بھارت نوں کنک ایکسپورٹ کرن اُتے ڈاڈھے تحفظات دا وکھالا کردے ہوئے آکھیا اے کہ بھارتی تاجر اک سوچی سمجھی سکیم دے تحت ایہ آفر دے رہے نیں تاں جے آن والے ویلے وچ اوہ افغانستان نوں کنک ویچن لئی واہگہ دے رستے راہداری ورت سکے۔
دوجے پاسے کئی ایسکپورٹرز نے محکما خوراک دے اعلا حکام نال ملاقات وچ آفر دِتی اے کہ جے محکما خوراک اوہناں نوں 165ڈالر فی ٹن اُتے کنک ویچن دیوے تے اوہ 3توں 5لکھ ٹن کنک واہگہ دے رستے بھارت لیجان وچ دلچسپی رکھدے نیں جدکہ ایہ ماترا 10لکھ ٹن تک وی پہنچ سکدی اے۔ ایس حوالے نال سیکرٹری فوڈ نے ایکسپوٹرز اُتے واضح کیتا اے کہ پہلے اک وڈی ماترا دی یقین دہانی کروائی جائے جدکہ 165ڈالر قیمت اُتے ایہ ایکسپورٹ ممکن نہیں اے ایس لئی ایکسپوٹرز ایس قیمت وچ مناسب وادھا کرن تاں جے پنجاب حکومت وی ایس بارے سنجیدگی نال سوچ سکے۔
وسیلیاں دے مطابق ایس حوالے نال چیف سیکرٹری پنجاب نوں وی بریفنگ دِتی گئی اے جہدے بعد اوہناں نے کیبنٹ کمیٹی دا اجلاس سَد کے ایہ معاملا بحث ہیٹھ لیان دی ہدایت کیتی اے۔ ایس توں وکھ پاکستان فلور ملز ایسوسی ایشن دے مرکزی رہنما عاصم رضا نے آکھیا اے کہ واہگہ دے رستے بھارت وچ کنک دی ایکسپورٹ ، بھارت دی سوچی سمجھی سکیم اے کیونکہ بھارت لَمے چِر توں واہگہ دے رستے افغانستان وچ کنک گھلن لئی راہداری دا مطالبا کردا رہیا اے، ہن اوہ پاکستانی کنک امپورٹ کر لووے گا تے فیر کجھ چِر بعد واہگہ راہیں کنک افغانستان گھلن دی کوشش کرے گا۔
