اسلام آباد(پاکستان پوائنٹ نیوز11۔جنوری2017ء) سپریم کورٹ وچ طیبہ تشدد کیس اُتے چیف جسٹس آف پاکستان جسٹس ثاقب نثار دے سوموٹو ایکشن دی سنوائی ہوئی۔ سنوائی دوران چیف جسٹس نے ڈی آئی جی اسلام آباد ولوں تحقیقات لئی دو ہفتیاں دی مہلت دی استدعا نوں رَد کر دِتا۔ چیف جسٹس دا کہنا سی کہ طیبہ تشدد کیس وچ تحقیقات صاف تے شفاف انداز وچ کیتیاں جان۔ اوہناں نے آکھیا کہ نادرا توں بالڑی دی شناخت بارے پُچھ گچھ کیتی جائے۔
بالڑی دی ڈین این اے رپورٹ آن اُتے عدالت وچ جمع کراﺅ۔ چیف جسٹس نے سنوائی دے دوران آکھیا کہ طیبہ کیس وچ میڈیکل بورڈ توں وی ہور وضاحت منگی جائے۔ چیف جسٹس نے حکم دِتا کہ طیبہ تشدد کیس دا مکمل ریکارڈ ای عدالت وچ جمع کروایا جائے۔ چیف جسٹس نے ایس دوران پُچھیا کہ اینی چھیتی بالڑی ،ماں پیو دی نشان کاری کیتے بغیر کیویں کسے دے حوالے کیتی گئی، کیہ وکیل راجا ظہور نوں تفتیش وچ شامل کیتا گیاجہنے صلح ناما لکھیا؟ اوہناں نے آکھیا کہ بالڑی دا والد تے کہندا اے کہ اوہدے کولوں انگوٹھے لوائے گئے۔
اوہ ان پڑھ اے۔ عدالت نے طیبہ نوں سویٹ ہومز گھلن دا حکم دِتا۔ جہدے اُتے چیف جسٹس نے ہدایت کیتی کہ بالڑی نوں اودوں تک اوتھے رکھنا ضروری اے جدوں تیک اوہدا ڈر دور نہیں ہوندا۔ اوہناں نے آکھیا کہ اسیں سچ دا کھوج لانا اے، تیزی نال کیس دا فیصلا کراں گے۔ عدالت نے آکھیا کہ ماں پیو دا پتا لگن تک طیبہ پاکستان سویٹ ہومز کول رہوے گی۔ سپریم کورٹ نے طیبہ دی ذمے واری ڈی آئی جی اعظم طارق نوں دِتی۔ سویٹ ہومز وچ پولیس نوں ہر طرحاں دی رسائی حاصل ہووے گی۔ سپریم کور ٹ نے طیبہ دا نفسیات دے ماہر توں چیک اپ کروان دا حکم وی دِتا۔ عدالت دا کہنا سی کہ طیبہ دے ماں پیو ہون دے دعویدار سارے بندیاں دے بیان ریکارڈ کیتے جان۔ جہدے بعد کیس دی ہور سنوائی 18جنوری تک ملتوی کر دِتی گئی اے۔
