ایبٹ آباد(پاکستان پوائنٹ نیوز09۔دسمبر2016ء) پی آئی اے دی اُڈان پی کے 661حویلیاں دے نیڑے ڈِگ کے تباہ ہوئی جہدے نتیجے وچ جہاز دے عملے سنے 47بندے شہید ہو گئے۔ حادثے والی تھاں اُتے سبھ توں پہلاں پہنچن والے عینی شاہد زاہد خان نے دسیا کہ جہاز ڈِگن توں کجھ دیر پہلے جہاز دے ایمرجنسی ایگزٹ دا بوہا کُھل گیا جہدے نال 7،8 مسافراں نے جہاز توں باہر چھال ماری پر افسوس کہ اوہ جہاز دے اُتے ای آ ڈِگے جہدی وجہ توں اوہ جانبر نہ ہو سکے۔
زاہد خان نے دسیا کہ جہاز تباہ ہون تے زمین نال ٹکران توں پہلے اک نیم دائرے وچ ساڈے ای پنڈ دے اُتوں لنگھیا سی۔ عینی شاہد دا کہنا سی کہ جہاز حادثے دے بعد مسافراں دیاں دردناک آوزاں سُنیاں پر جدوں تیکر اسیں وقوعا والی تھاں اُتے پہنچے فیول ٹینک وچ دھماکا ہون نال اوتھے اگ لگ چکی سی۔ زاہد دا کہنا سی کہ جہاز ڈِگدا ویکھ کے اوہدا پِچھا کیتا تے ٹیلی فون دے ذریعے اپنے دوستاں نوں وی اطلاع دِتی۔
زاہد دا کہنا سی کہ حادثے والی تھاں اُتے پہنچن والا پہلا بندا میں سی جو جہاز تباہ ہون دے ٹھیک 10منٹ بعد ای وقوعا اُتے موجود سی جدکہ پنڈ دے واسی بندیاں نے اپنی مدد آپ دے تحت اگ بُجھان دی کوشش وی کیتی پر اودوں تیکر ساریاں لاشاں شناخت جوگ نہیں رہیاں سن۔ زاہد نے دسیا کہ سارے مسافر تے پائلٹس دیاں لاشاں وی سڑ گئیاں سن۔ زاہد خان نے دسیا کہ جنید جمشید دا پرس وی سبھ توں پہلے مینوں ای لبھیا سی جہدے وچ 5توں 6ہزار رُپئے نقد تے اوہناں دے وزٹنگ کارڈ موجود سن۔
اوہدا کہنا سی کہ میں ساریاں شیواں ڈی ایس پی خورشید تنولی دے حوالے کر دِتیاں نیں۔ زاہد دا ہور کہنا سی کہ جنید جمشید دے بعد مینوں ڈی سی چترال اسامہ وڑائچ دا شناختی کارڈ وی ملیا۔ زاہد نے ایس خوفناک حادثے بارے دَسدے ہوئے آکھیا کہ جے جہاز آبادی اُتے آ ڈِگدا تے زیادا جانی نقصان ہوندا۔
