اسلام آباد(پاکستان پوائنٹ نیوز24۔اکتوبر۔2016ء) پی ٹی آئی چیئرمین عمران خان دا کہنا اے کہ جدوں وی نواز شریف خلاف تحریک شروع ہووے تے کنٹرول لائن اُتے گڑ بڑ شروع ہو جاندی اے، اوہناں نے آکھیا کہ ایسے گل نوں نظر وچ رکھدے ہوئے سوچو کہ نواز شریف توں وڈے سکیورٹی تھریٹ ہور کیہ ہو سکدے نیں۔ تفصیل دے مطابق پیر دے دیہاڑے بنی گالہ دے باہر پرچا کاراں نال گل بات کردے ہوئے عمران خان دا کہنا سی کہ نواز شریف نوں صورتحال توں کڈھن لئی انج دے واقعات ہوندے نیں، اوہناں نوں پتا اے کہ اوہ پھڑے جان گے، ایس لئی اوہ نس رہے نیں۔
اوہناں نے مطالبا کیتا کہ قومی سلامتی دے اجلاس دی خبر لیک کروان والے نوں ساہمنے لیاندا جائے، اوہناں نے آکھیا کہ وزیر دفاع دا کم نواز شریف نوں تحفظ دینا نہیں اے۔ عمران خان دا کہنا سی کہ موٹو گینگ کدی شوکت خانم تے کدی میرے اُتے حملے کر رہیا اے۔ اوہناں نے آکھیا کہ حکومتاں الزام نہیں لاندیاں اوہناں د ا کم ایکشن لینا ہوندا اے۔اوہناں دا کہنا سی کہ جھوٹھ بول بول کے اوہناں دیاں مونہاں اُتے لعنتاں پے گئیاں نیں، اوہناں نے آکھیا کہ نواز شریف نہیں بچ سکدا، نواز شریف نے خبر لیک کروا کے فوج خلاف سازش کیتی اے، فوج نوں کَلا کرن لئی نواز شریف توں وڈا سکیورٹی تھریٹ کیہ ہو سکدا اے،نواز شریف فوج لئی خطرا بن گیا اے، نریندر مودی نواز شریف نوں فوج توں وکھ کر رہیا اے۔
اوہناں نے سوال کیتا کہ کیہ فوج لئی بیان دینا وزیر دفاع دا کم نہیں اے۔ اوہناں نے آکھیا کہ خواجا آصف نوں فوج خلاف سازشاں دا جواب دینا چاہیدا سی۔ اوہناں نے آکھیا کہ پاناما لیکس وچ میرا ناں نہیں آیا فیر وی میں اپنے آپ نوں احتساب لئی پیش کیتا، دو نومبر بارے گل بات کردے ہوئے اوہناں نے آکھیا کہ 10 لکھ لوکاں نوں کوئی پولیس نہیں روک سکدی، ہو سکدا اے کہ موٹو گینگ لئی فوج دی لوڑ وی پئے، اوہناں نے الزام لایا کہ وزیر اعظم بھارت تے اسرائیل توں مدد منگ رہے نیں، موجودا حکمراناں نے ملکی نظریا تے اخلاقیات نوں تباہ کر دِتا اے۔ اوہناں نے آکھیا کہ وزیر اعظم نواز شریف آپ چور اے ایس لئی دوجیاں دی اوہ چوری نہیں پھڑ سکدا۔
