اسلام آباد(پاکستان پوائنٹ نیوز24۔اکتوبر۔2016ء) سابق وزیر داخلا و سینیٹر رحمان ملک نے مطالبا کیتا اے کہ پاناما لیکس تے کرپشن دے معاملے اُتے جوائنٹ سیشن بلایا جائے، پی ٹی آئی دا اسلام آباد بند کرن دا فیصلا غیر آئینی اے، عمران خان صاحب قوم جاندی اے کہ ایمپائر کون اے، نواز شریف نوں چاہیدا اے کہ اوہ عمران خان کول جائے، اوہناں نال رلکے کوئی فیصلا کرے، ضرب عضب وانگ اک سیاسی ضرب عضب دی لوڑ اے۔
تفصیل دے مطابق پیر دے دیہاڑے میڈیا نال گل بات کردے ہوئے رحمان ملک نے آکھیا کہ مسائل دے حل لئی پارلیمنٹ دا فورم موجود اے، سانوں لوکائی دے مسائل حل کرن دی گل کرنی چاہیدی،جے حکومت نے عوامی مسائل حل نہ کیتے تے لوکائی دا جمہوریت توں اعتبار اُٹھ جائے گا۔ سابق وزیر داخلا نے آکھیا کہ پاکستان دے وجود نوں خطرے وچ پان دی کوشش کیتی جا رہی اے، عمران خان دا اسلام آ باد بند کرن دا فیصلا غیر آئینی اے۔
اوہناں نے آکھیا کہ ملک وچ ضرب عضب وانگ سیاسی ضرب عضب وی ہونا چاہیدا، نواز شریف نوں چاہیدا کہ عمران خان کول جائے، اوہناں نال ملے تے کوئی رلکے فیصلا کرے۔ اوہناں نے آکھیا کہ پاناما لیکس دے بعد ہن سکیورٹی لیکس آ گئیاں نیں، خدا نہ کرے کہ آن والے وقت وچ جمہوریت لیک ہو جائے، ملک ایس ویلے نازک صورتحال توں لنگھ رہیا اے۔ اوہناں نے آکھیا کہ آن والے دِناں وچ وڈی تباہی ویکھ رہیا واں، ہر سیاستدان شیشے دے گھر وچ رہندا اے، کسے اُتے الزام لان توں پہلے 10 وار سوچنا چاہیدا۔ رحمان ملک نے آکھیا کہ ایمپائر دی انگلی بارے عمران خان ای دَس سکدے نیں پر عمران خان صاحب قوم جاندی اے کہ ایمپائر کون اے۔
