کراچی(پاکستان پوائنٹ نیوز24۔اکتوبر۔2016ء) وفاقی وزیر اطلاعات و نشریات پرویز رشید نے آکھیا اے کہ پاناما لیکس دا معاملا عدالت وچ اے، عمران خان عدالتی فیصلے دا انتظار کرن، دھرنے دا کوئی جواز نہیں بندا، عمران خان نادر شاہی سیاست کر رہے نیں، اوہناں دا ایجنڈا ملک دشمن طاقتاں نال رلدا اے، اوہ نہیں چاہندے کہ سی پیک دا منصوبا مکمل ہووے تے پاکستان ترقی کرے۔
تفصیل دے مطابق پیر دے دیہاڑے امجدی صابری دے گھر والیاں نال ملاقات دے بعد پرچا کاراں نال گل بات کردے ہوئے پرویز رشید دا کہنا سی کہ پاناما لیکس دا معاملا عدالت وچ اے ایس لئی عمران خان عدالتی فیصلے دا انتظار کرن ۔ اوہناں نے آکھیا کہ عمران خان نادر شاہی سیاست کر رہے نیں، اوہناں دا ایجنڈا ملک دشمن طاقتاں نال رلدا اے، اوہ نہیں چاہندے کہ سی پیک دا منصوبا مکمل ہووے تے پاکستان ترقی کرے۔
پرویز رشید دا کہنا سی کہ حکومت اسلام آباد وچ زندگی دے معمولات بحال رکھن لئی سارے قانوناں اُتے عمل درآمد نوں یقینی بنائے گی، اعتزاز احسن کول جھیڑوی خبر دے حوالے نال کوئی ثبوت نیں تے اوہ عدالت وچ جان۔ اوہناں نے آکھیا کہ میں غریب بندا واں شیخ نہیں، شیخ اوہ ہوندا اے جو شیخیاں ماردا اے۔ اوہناں نے آکھیا کہ امجد صابری دے گھر والیاں دی کفالت لئی اک کروڑ رُپئے دا چیک دِتا اے جو میں اوہناں دے گھر والیاں دے حوالے کر دِتا اے۔
اوہناں نے آکھیا کہ امجد صابری نے پوری دنیا وچ پاکستان دا ناں روشن کیتا۔ اوہناں نے آکھیا کہ ایہ امدادی چیک دا مقصد اے کہ امجد صابری دے بال بہتر انداز نال تعلیم حاصل کر سکن تے اپنے پیراں اُتے کھلو کے پاکستان دی خدمت کر سکن۔ اک سوال دے جواب وچ اوہناں دا کہنا سی کہ اکتوبر دا مہینا چل رہیا اے ، اکتوبر دا مہینا پاکستان وچ وزیر اعظم خلاف سازشاں دا مہینا اے، اکتوبر 1951 توں وزیر اعظماں خلاف محلاتی سازشاں شروع ہوئیاں تے ایہدا پہلا شکار سبھ توں پہلے وزیر اعظم لیاقت علی خان بنے، اوہناں نوں اکتوبر دے مہینے وچ اوس ویلے شہید کیتا گیا جدوں اوہ مکا وکھا کے قوم نوں اکٹھا کر رہے سن۔
