اسلام آباد(پاکستان پوائنٹ نیوز۔30ستمبر 2016) وفاقی کابینا نے بھارت دے سرجیکل سٹرائیکس دے دعوے نُوں رد کردیاں ہویاں کہیا اے کہ بھارتی اقدام عالمی قوانین تے آپسی معاہدیاں دی خلاف ورزی اے جہدا عالمی برادری نُوں وی نوٹس لینا چاہیدا اے‘ وفاقی کابینا نے پاک فوج دے مسلح جواناں نُوں کراج تحسین پیش کیتااے تے کہیا کہ پاک فوج دے جواناں نے بھارتی جارحیت دا مونہ توڑ جواب دِتا اے‘ وفاقی کابینا نے اِک واری فیر عالمی برادری توں مقبوضا کشمیر وچ انسانی حقاں دیاں خلاف ورزیاں دی مکمل تحقیقات دا مطالبا کیتا اے‘ وزیراعظم نے اجلاس نال خطاب کردیاں ہویاں کہیا کہ امن دی خاہش نُوں ساڈی کمزوری نہ سمجھیا جاوے‘ ایل او سی اُتے کِسے وی قسم دی خلاف ورزی برداست نہیں کراں گے تے لوکائی دی حفاظت نُوں یقینی بناواں گے۔
وزیراعظم نواز شریف نے کہیا کہ بھارت خطے نفوں جنگ و جدل وچ سُٹن لئی کوئی کسر باقی نہیں چھڈ رہیا۔ بھارت نُوں واضح کر دینا چاہندا آں کہ ملک دا بچا بچا ملکی دفاع لئی جان قربان کرن نُوں تیار اے تے پوری قوم مسلح وج دے نال کھلوتی اے‘ بھارت دی کِسے وی مہم جوئی دا بھرواں جواب دِتا جاوے گا‘ وزیراعظم نے کہیا کہ پاکستان بھارت دی مہم جوئی دا بھرویں انداز وچ جواب دین لئی ہر ویلے تیار اے‘ پاکستان دی سرزمین اُتے کِسے نُوں میلی نگاہ پان دی اجازت نہیں دواں گے تے پاکستان دی مسلح فوج بھرویں انداز نال اپنے دفاع لئی تیار اے‘ ملک دا بچا بچا ملکی دفاع لئی جان قربان کرن نُوں تیار اے تے پوری قوم مسلح فوج دے نال کھلوتی اے۔
اوہناں نے کہیا کہ پاکستان دی ترجیح خطے توں غربت‘ بے روزگاری دا خاتما اے تے غربت‘ بیروزگاری دے خاتمے سے ترقی تے خشحالی دی منزل دا حصول ساڈا عزم اے‘ سانوں توانائیاں لوکائی دی فلاح و بہبود تے تعمیر و ترقی اُتے مرکوز رکھنیاں چاہیدیاں نیں‘ اسیں ایہدے لئی سرگرم آں تے اسیں چاہندے آں کہ جنوبی ایشیائی خطے سنے پوری دنیا وچ امن قایم ہووے۔
اوہناں نے کشمیر دے حوالے توں کہیا کہ کشمیر تقسیم ہند دا نامکمل ایجنڈا اے تے جے بھارتی فوج دا تشدد تے مظالم جاری وی رہندا اے تے اوہ کشمیریاں دے جذبا حریت نُوں مدھ نہیں سکدے تے پاکستان بھرویں انداز وچ کشمیریاں دی اخلاقی تے سفارتی مدد جاری رکھے گا۔ اوہناں نے کہیا کہ مقبوضا کشمیر وچ قابض بھارتی فوج ولوں انھے واہ بربریت پاکستانیاں لئی ناقابل قبول اے۔ اوہناں نے کہیا کہ بھارت ولوں سرحدی خلاف ورزیاں ودھدیاں جا رہیاں نیں۔
