اسلام آباد(پاکستان پوائنٹ نیوز18۔فروری2017ء) نجی ٹی وی چینل دے اک پروگرام وچ گل بات کردے ہوئے مسلم لیگ (ن) دے رہنما انور بیگ اپنی ای حکومت خلاف بول پئے۔ انور بیگ دا کہنا سی کہ میری اپنی حکومت اے پر میں فیر وی ایہو آکھاں گا کہ دہشت گردی دے معاملے اُتے اسیں سنجیدا نہیں آں۔ انور بیگ نے آکھیا کہ آرمی پبلک سکول اُتے حملے مگروں مینوں لگا کہ اسیں سبق سکھ لیا اے پر بدقسمتی نال انج نہیں ہویا۔
اوہناں نے آکھیا کہ ملک وچوں دہشت گردی دے خاتمے لئی نیشنل ایکشن پلان بنا دِتا گیا ، ہور تے ہور سیف سٹی منصوبے دے تحت کیمرے وی لائے گئے پر ایہدے مگروں وی دہشت گرد جتھے چاہون حملا کر رہے نیں۔ اوہناں دا کہنا سی کہ پچھلے ست دِناں وچ دہشت گرداں نے ملک دے چاراں صوبیاں نوں نشانا بنایا، غریب لوک، وکھالیاں تے ایس طرحاں دے لوک جو خریداری پاروں مارکیٹاں وچ جاندے نیں تے جہناں دا کسے نال وی کوئی لینا دینا نہیں ہوندا اوہناں نوں ماریا جا رہیا اے۔
انور بیگ نے آکھیا کہ ایہو ویلا اے کہ وزیر اعظم نوں سکیورٹی صورتحال اُتے آن والے 2توں 3ورھیاں تک ہر پیر نوں اک اجلاس بُلانا چاہیدا، اجلاس وچ ملک دی سکیورٹی صورتحال دا جائزا لتا جائے تے ایہ اجلاس اودوں تک کروائے جان جدوں تک حکومت نوں ایس گل دا اطمینان نہیں ہو جاندا کہ دہشت گردی نوں جڑوں پُٹ دِتا گیا اے۔ انور بیگ نے اپنی ای جماعت نوں کس طرحاں تنقید دا نشانا بنایا تُسیں وی ویکھو!
