لاہور(پاکستان پوائنٹ نیوز14۔فروری2017ء) ڈاکٹر نوید شہزاد ہوریں پنجابی زبان و ادب وچ اک وڈا ناں اے جو اپنے سُچل کم دی وجہ توں اک وکھری پچھان وی رکھدے نیں۔اوہ اجہے آہری بندے نیں جو ادب دی سیوا وچ رُجھے ہوئے نیں اجہے پنجابی سوجھوان اصل معنیاں وچ اپنی زبان نال مخلص لگدے نیں۔نظم،غزل،تحقیق اوہناں دے خاص وشے نیں جس اپر اوہ سر سُٹ کے کم کری جا رہے نیں۔
ایہ اجہی سوچ نوں من دے نیں جو ریت توں اگے نکلن دی گل ہووے ایس لئی اوہ نویں زاویے توں سوچ کے لکھن والیاں دی تھوڑی تعداد وچوں نیں۔اوہناں دی نویکلی کتاب'" رجحان ساز نویں پنجابی نظم(چون)"چھپی اے۔کتاب دے شروع وچ نویں نظم دے رجحان بارے آپ دا اک بھرواں مقالا اے جس وچ نویں نظم بارے گل بات بڑے ٹھوس انداز تے حوالیاں نال کیتی گئی اے۔۔آپ دی ایہ کتاب پنجابی نظم دے ایہناں شاعراں نال سجائی گئی اے احمد راہی،احمد سلیم،افضل احسن رندھاوا،الطاف قریشی،باقی صدیقی،راشد حسن رانا،سارا شگفتہ،سلیم شہزاد،شریف کنجاہی،منیر نیازی،نجم حسین سید،نسرین انجم بھٹی تے نوید شہزاد۔
ڈاکٹر جمیل احمد پال ہوراں نے ایس کتاب دے دیباچے وچ ایوں رائے دتی اے"آپ جدید نظم دے اہم شاعر ہون دے نال نال نویں پنجابی نظم دی فکری تے فنی سفر توں وی چنگی طرحاں واقف نیں۔اوہناں نے نویں پنجابی نظم دی درجن سارے رجحان ساز شاعراں دی نہ صرف چون کیتی سگوں اوہناں بارے بے لاگ رائے وی دتی اے۔ اوہ اپنی شاعری ایس چون وچ شامل کرن دے حق وچ نہیں سنتے سودھکار دا بطور شاعر،اپنی کتاب وچ شامل ہونا مناسب نہیں سن سمجھدے،حالاں نویں رجحان ساز پنجابی نظم دی چون اوہناں دی شمولیت بِنا ادھورانی اے کیوں جے اوہ نویں نظم دے رجحان ساز شاعراں وچ شامل نیں۔ کتاب دا م±ل تِن سو روپے اےتے ک±ل صفحے 144نیں۔ایس کتاب نوں بڑے سچجے ڈھنگ نال پنجابی مرکز لاہور نے چھاپیا اے۔
