اسلام آباد(پاکستان نیوز پوائنٹ 21فروری2016ء) پاکستان مسلم لیگ (ن) نا راہشون دانیال عزیز پارینے کہ نن احتساب آ مناظرہ کننگ کن تیار اُن ، خیبر پختونخوا ٹی احتساب کمیشن اس اڈ تفروک آ نیب و ایف بی آر آ دوبہ خلنگ ءِ۔ وزیراعظم محمد نواز شریف تینے عدالت نا مون آ احتساب کن پیش کرینے، جہانی ادارہ غاتا جاچ آتیٹی خیبر پختونخوا ٹی تحریک انصاف حکومت نا ہیبدار کارکڑد غٹ انا مون آٹی ءِ۔
سے شنبے آ داڑے پاناما کیس انا سماعت آن پد میڈیا تون ہیت وگپ کرسا اوپارے کہ ایف بی آر و نیب آ دوبہ خلنگ درست ءُ عمل اس اف اوپارے کہ او حکومت نا اشارہ غاتیا کاریم کپک، نیب انا چیئرمین ءِ حکومت آخا بلکن جج کمیشن بدل کیک۔ دانیال عزیز پارے کہ نیب و ایف بی آر آ دوبہ خلسا عدالت نا چہرہ غا داغ تخنگ نا کوشست کننگانے۔ اوپارے کہ ہراتم ہم مسلم لیگ (ن) نا حکومت برسراقتدار بریک اوڑآ کیس آتے قائم کننگک داسہ ہم سپریم کورٹ اٹی ہمو کیس ءِ دُوارہ ملنگ نا کوشست کننگانے ہرافتیا مست آن عدالتی فیصلہ بسنے۔
اوپارے کہ دا کیس آتا بابت نیب پارینے کہ اوفتے ٹی ہچ اس اف وخت اس کہ ایف بی آر نا پاننگ ءِ کہ دا کیس انا بابت نوٹس جاری کننگانے ہراتم ورندی اس بریک تو کیس ءِ مون آ چلینگک۔ اوپارے کہ جسٹس انور جمالی صاحب نا دور اٹی ہراتم عمران خان پٹیشن اتسا بسوسس تو جسٹس صاحب پارے کہ کمیشن اس اڈتننگے ہراڑآ عمران خان انکار کریسس ولے غٹ آن مست وزیراعظم محمد نواز شریف عدالت ءِ درخواست تس کہ کسی ءِ چلیفنگے و تینے عدالت نا مون آ پیش کرے۔
اوپارے کہ عمران خان بیرہ دوبہ خلیک اوڑتون شاہدی اف ، خان صاحب الیکشن کمیشن و سپریم کورٹ آن نرنگ نا کوشست کننگ ءِ۔ دانیال عزیز پارے کہ عمران خان نا خیبر پختونخوا ٹی ہیبدار کارکڑد آ غٹ جہانی تنظیمک تینا تینا سروے پیش کرینو ، خیبر پختونخوا ٹی احتساب کمیشن اڈتفروک آ عمران خان ڈکنگ ءِ تینے ، پی ٹی آئی انتشار نا گواچی ءِ۔ دانیال عزیز پارے کہ داسہ ڈکوک آسیاست چلینگپک کارکڑد نشان تروئی مریک۔
اوپارے کہ دوخلنگ نا باوجود محمد نواز شریف مسٹ میکو وار وزیراعظم گچین مسنے و اونا گچین پالیسی تا سوب ملکی معیشت اٹی گچینی بسنے ، دہشت گردی نا مون ءِ توننگا، ریاست سوگومس، داہیت انا اعتراف ءِ دنیا نا غٹ جہانی تنظیمک کننگ ءُ۔ او عمران خان ءِ چیلنج کرسا پارے کہ نن احتساب کن تیار اُن ہراسٹ ءِ مناظرہ کروئی ءِ برے، سیاسی پوائنٹ سکورنگ آن پاناد کننگے انتئے کہ دوبہ غاتا حق آتون تعلق المی ءِ۔
